🎯 *Tambazotra iray mpamarina vehivavy tanora malagasy* avy ao amin’ny faritra Atsinanana, izay am-panambadiana am-pitaka na an-tery amina teratany sinoa no ravan’ny Polisy avy ao amin’ny sampan-draharaha misahana ny Fanadihadiana Manokana sy Miady amin’ny Hosoka (SCESLF), ny herinandron’ny 23 febroary lasa teo. Natolotra ny fitsarana omaly 6 Marsa, ny teratany sinoa miisa 8 sy teratany malagasy miisa 3, izay voasambotra tao Toamasina; ka ny 4 tamin’ireo dia naiditra am-ponja vonjimaika eny amin’ny fonjan’ny Tsiafahy ary ny 7 eny Antanimora.
👉 *Vehivavy* iray, niharam-boina, voafitaka mahakasika tolotr’asa any Chine no nitaraina tamin’ny fianakaviany, ka ireto farany no tonga nitoroka teny anivon’ny mpitandro ny filaminana sy nitantara ny mahazo ny zanany izay voafandrika any Chine. Nofitahina ity vehivavy ity fa tsy maintsy manambady sinoa raha toa ka te hipetraka maharitra sy hiasa any Chine ka nanaiky izy. Namidy, nijaly ary niharan’ny herisetra isan-karazany anefa izy rehefa tonga tany Chine. Diso fanantenana tanteraka rehefa tonga tao an-tokantranon’ilay hoe vadiny, izay nividy azy. Sady tsy nahazo nivoaka ny trano no tsy nahazo niasa fa fiterahana ao anaty fotoana fohy no fifanarahan’ ilay vady nividy sy ireo nivarotra azy.
🤝 *Fiaraha-mientan’ny tomponan’andraikitra:* tafody soa aman-tsara teto an-tanindrazana ity vehivavy niharam-boina ity rehefa niara-nientana tamin’izany ny teo anivon’ny Polisimpirenena, ny BCN-INTERPOL Antananarivo izay niara-niasa tamin’ny BCN-INTERPOL Beijing ary ny Minisiteran’ny Raharaham-bahiny.
👉 *Tao anaty fanadiadiana* no nahafantarana fa tambazotra tao Toamasina no namitaka sy nivarotra ity vehivavy ity tamina teratany sinoa. Nifarimbona niaraka tamin’ny Polisy misahana ny ady amin’ny famarinana olombelona ireo polisy miasa ao Toamasina ka voasambotra tamin’izany ny teratany sinoa miisa 3 izay nivarotra ity vehivavy ity, ary teratany sinoa hafa miisa 5 izay mandalo eto Madagasikara nividy vehivavy ho vady .
👉 *40 tapitrisa Ariary ka hatramin’ny 180 tapitrisa Ariary no amarotana ny vehivavy malagasy iray any Chine.* Raha ity raharaha ity dia 70 tapitrisa Ariary no namarotana ity vehivavy tafody ity ary ny 3 tapitrisa Ariary tamin’io ihany no nomena azy sy ny ray aman-dreniny ho fikarakarana ny fanambadiana sy ho vodiondry. Hita tao anaty fanadihadiana fa manelanelana ny 40 tapitrisa Ariary hatramin’ny 180 tapitrisa Ariary ny hivarotana ny vehivavy am-panambadiana teratany sinoa ary ny 3 tapitrasa Ariary ihany no omen’ny mpivarotra azy ireo azy ho fikarakarana ny fanambadiana sy ho « vodiondry » ho an’ny ray aman-dreny. Misy vondrona amina tambazotran-tserasera hifampiresahan’ireto sinoa mpanera vady ireto ary aranty toy ny entam-barotra, miaraka amin’ny sary sy ny vidin’ny vehivavy ao anatin’io vondrona io ka izay liana amin’izany dia mandefa vola sy tonga mividy azy eto Madagasikara. Fitaka sy fanantenana poakaty kosa no handresena lahatra ny vehivavy malagasy mba hanekeny ny fanambadiana. Betsaka ny iharan’ny herisetra rehefa tonga any an-toerana ary maro ireo fitarainana azo.
👉 *Raha ny taona 2025* dia vehivavy 5 voafitaka, namidy, noterena nanambady ary niharan’ ny herisetra, no tafody soamatsara teto an-tanindrazana rehefa niara-nientana ny tompon’andraikitra. Raharaha 3 mahakasika ireo no efa natolotra ny fitsarana ary mitohy ny fanadiadiana ho an’ny ambiny.
⚠️ *Manentana ny vehivavy tanora malagasy* mba hitandrina sy hanadihady tsara rehefa misy resaka tolotr’asa any ivelany, hisorohana ny tranga famarinana olombelona toy izao. Ary ho an’ireo izay mahita na maheno tranga miendrika famarinan’olombelona dia entanina hatrany hitoroka eny anivon’ny sampandraharahan’ny Polisimpirenena akaiky indrindra.