➡️ Tonga maro niombom-bavaka tao amin’ny « Chapelle Militaire Ampahibe » ny talata 04 Martsa 2025 ireo fikambanan’ny vadin’ny mpitandro ny filaminana sy mpitandro ny filaminana vehivavy, mivondrona ao amin’ny FIVAPOVA, FIVAZA ary FIVAMI. Tafiditra tanteraka ao anatin’ny fankalazana ny andro iraisam-pirenena ho an’ny Zon’ny Vehivavy, izay any Mahajanga ny ivon’ny fankalazàna, ny Sabotsy 08 Martsa 2025 ho avy izao ary eo ambany fitarihan’ny vadin’ny Filoham-pirenena, Ramatoa Mialy Rajoelina, ity fotoam-bavaka ity.
Fotoam-pivavahana nokarakarain’ny Fikambanan’ny Vadin’ny Polisy sy Polisy Vavy (FIVAPOVA), ny Fikambanan’ny Vadin’ny Miaramila (FIVAMI), ary ny Fikambanan’ny Vadin’ny Zandary (FIVAZA) ity natao androany ity. Tonga nanome voninahitra izany ny vadin’ny Praiminisitra Lehiben’ny Governemanta, Ramatoa Léa NTSAY. Noentina am-bavaka manokana ny vehivavy rehetra mba hahafahan’izy ireo mitombo fahasalamana sy manatanteraka ny adidiny eo amin’ny ankohonany sy ny firenena.
➡️ « Fitovian-jo sy Fizakan-tena ho an’ny Vehivavy sy ny Tovovavy Rehetra » ny lohahevitra entina hanamarihana ny andro iraisam-pirenena ho an’ny Zon’ny Vehivavy amin’ity taona ity.