➡️ Nitrangana halatra omby tao amin’ny tanànan’i Magnoroky, distrikan’i Toliara II, ny alin’ny 03 martsa 2025. Lasan’ireo andian-dahalo tamin’izany ireo omby miisa 20. Nampandre avy hatrany ny Polisy miasa amin’ny sakan-dalana ao Andemby ny Fokonolona.
Niroso tamin’ny fanarahan-dia ny Polisimpirenena . Vokany, raikitra ny fifandonana sy fifampitifirana teo amin’ny sampanan-dalana tao Andemby, teo dia efa azo ny omby miisa 7. Nitohy ihany ny fanarahan-dia izay tonga tany Ankiliberengy, atsinanan’ny Kaominina Behompy. Ny 04 martsa 2025 vao maraim-be, resy tosika ireo dahalo ka navelany ireo omby halatra, ny iray kosa novonoin’ireo olon-dratsy.